Բևեռափայլը, Յուլուպուկին և հեքիաթային Ռովանիեմին

Նկարում Ֆինլանդիան է՝ ձներով ծածկված եղևնիներով և հյուսիսափայլով — Բևեռափայլը Լապլանդիայում

Չքնաղագեղ ու հեքիաթային Ռովանիեմին

Ինչքան ակտիվանում է արեգակը և իր արյվող շիթերից փնջեր ուղարկում դեպի երկիր, այնքան ավելի գույնզգույն է դառնում Ռովանիեմիի երկնակամարը:

Իսկ որտե՞ղ է Ռովանիեմին, հավանաբար կհարցնեք դուք:

Չքնաղագեղ ու հեքիաթային քաղաք Ռովանիեմին գտնվում է Ֆինլանդիայի հյուսիսային մարզերից մեկում՝ Լապլանդիայում: Այո-այո, հենց այն Լապլանդիայում, ուր բնակվում է հռչակավոր Յուլուպուկին՝ Ձմեռ Պապը: Դե իսկ որտեղ ապրում է Յուլուպուկին, այնտեղ հրաշքներն անպակաս պետք է լինեն և հրաշագործ Ձմեռ Պապը՝ իր անբաժան օգնական-եղջերուների օգնությամբ, աշխարհե աշխարհ պիտի սլանա ու բոլոր երեխաներին ուրախացնի նրանց համար նախատեսված անթիվ-անհամար նվերներով:

Ռովանիեմիում բնակվող Յուլուպուկիի նվերներին սպասում են աշխարհի բոլոր ծայրերում

Հյուսիսային Ֆինլանդիայի երկրորդ խոշոր քաղաք Ռովանիեմին լավագույն վայրերից մեկն է, որտեղ կարող ես զմայլվել կախարդական լույսերով լեցուն երկնակամարով:

Դա հյուսիսափայլն է, որը երկինքն ասես նետահարում է պայծառ ճառագայթներով, ստիպելով նրան անընդհատ փոփոխվել իր երփներանգների մեջ: Սակայն մի փոքր ճշտում մտցնենք: Նախ արեգակն է իր հսկայական շիկացած նետերով, այսինքն էլեկտրականությամբ լիցքավորված մանրագույն մասնիկների հոսքերով, այսպես կոչված արևային քամիով ռմբահարում մեր երկինքը, և հետո, դա նկատվում է ոչ միայն երկրագնդի հյուսիսում, այլև հարավում: Եվ լավ կլինի եթե մենք այս երևույթը բնորոշենք բևեռափայլ բառով:

Բևեռափայլեր բացի Երկիր մոլորակի բևեռային մակերևույթից դիտվում են նաև Սատուրնի մակերեսին:

Ասում են, թե 11-րդ դարում Հայաստանում նույնպես դիտվել են բևեռափայլեր: Մենք փորձում ենք հավաստի տեղեկություններ հավաքել և նյութը պատրաստ լինելուն պես մեր հաջորդ նորությունների մեջ մատուցել մեր Ընթերցողին, իսկ այժմ եկեք վայելենք բևեռափայլի հրաշքները...

Բարի երթ...